Mass Blood Donation

“DUGO: Balaog Itinao, Balaog Ihiras

Dakulang orgulyo kan Bicol Medical Center – Blood Bank and Transfusion Service, an maimbwelto sa pagsilebrar kan ika tresientos na taon kan debosyon ki INA, an Birhen de Penafrancia. Pinaagi sa sarong pangaturogan, an ”Dugo: Balaog itinao, Balaog Ihiras” naging sarong riyalidad. 
Sa paagi kan Barangay Penafrancia, nabilog an kunsepto kan aktibidad na ini sa pakikipagtabangan sa Archdiocese of Caceres, Penafrancia Parish, Lokal na Gobyerno kan Naga asin an manlaen laen na parokya na nasasakupan kan arkidyosises kan Caceres. An Dugo Balaog itinao, Balaog Ihiras sarong “Mobile Blood Donation Activity” na an mayor na katuyohan iyo na masumpayan an buhay kan mga pasyenteng nangangaipo na masalinan nin dugo bako sana didgi sa satuyang lugar kundi pati na sa bilog na Kabikolan. Ini sarong pagpapahiling nin pagkakasararo asin pagmakulog sa satuyang kapwa sa lindong kan balaog na pagpadangat ni INAng Birhen de Penafrancia. 
An lakdang na ini sarong pagpapatunay sa kakayahan kan lambang parokyano na maipamate an debosyon sa paagi kan pagdusay kan sadiring dugo para sa kapwa. Tres sientos hale sa manlaenlaen na parokya an boluntaryong madunar nin dugo na minasimbolo kan ika 300 na taon kan debosyon sa Birhen de Penafrancia, an INA kan Kabikolan.